મુખ્યમંત્રી વિજય રૂપાણીનું રાજીનામું, પાર્ટીનો આભાર માન્યો, કહ્યું- 'વડાપ્રધાન નરેન્દ્ર મોદીનું માર્ગદર્શન મળ્યું', નવા નેતૃત્વમાં ગુજરાતનો વિકાસ થશે અને નવા આયામ સર થશે તેવી આશા સાથે હું આજે મુખ્યમંત્રી પદેથી વિદાય લઉં છું.

ગુજરાતના રાજકરણમાં એકાએક નવા જુનીના એંધાણ છે. મુખ્યમંત્રી પદેથી વિજય રૂપાણીએ એકાએક રાજીનામું આપ્યું છે. કેન્દ્રિય મંત્રી પુરૂષોત્તમ રૂપાલાએ કહ્યું કે આગામી રણનીતિ એકાદ દિવસમાં નક્કી થશે. આવતીકાલ સાંજ સુધી સ્થિતિ સ્પષ્ટ થશે. આજે મોડી સાંજે કે કાલે સવારે ધારાસભ્યોની બેઠક બોલાવીને નવા મુખ્યમંત્રી અંગે ચર્ચા કરવામાં આવશે.

શનિવારે એકાએક વિજય રૂપાણી ગુજરાત સરકારના ટોચના અન્ય મંત્રી નાયબ મુખ્યમંત્રી નીતિનભાઈ પટેલ, સંસદીય મંત્રી ભૂપેન્દ્રસિંહ ચુડાસમા સાથે રાષ્ટ્રીય ભાજપ રાષ્ટ્રીય સંગઠન મહામંત્રી બી એલ સંતોષ રાજભવન પહોંચ્યા હતા અને આચાર્ય દેવવ્રતને રાજીનામું આપ્યું છે.

વર્ષ 2022ની ગુજરાત વિધાનસભાની ચૂંટણી પહેલા ગુજરાતની રાજનીતિના સૌથી મોટા સમાચાર સામે આવ્યા છે. ગુજરાતના મુખ્યપ્રધાન પદેથી વિજય રૂપાણીએ રાજીનામું આપ્યું છે. મુખ્યપ્રધાન વિજય રૂપાણી તેમજ પ્રધાનમંડળના તમામ સભ્યો રાજ્યપાલ દેવવ્રત આચાર્યને મળવા પહોંચ્યા. જે બાદ વિજય રૂપાણીએ મુખ્યપ્રધાન પદેથી રાજીનામું આપ્યું. રાજીનામું આપ્યા બાદ વિજય રૂપાણીએ પત્રકાર પરિષદ સંબોધી પોતે મુખ્યપ્રધાન પદેથી રાજીનામું આપ્યાની સત્તાવાર જાહેરાત કરી.

તેમણે જણાવ્યું કે મને ગુજરાતના મુખ્યપ્રધાન તરીકે સેવા કરવાની તક આપવા બદલ ભારતીય જનતા પાર્ટીનો આભાર માનું છું. વડાપ્રધાન મોદીના નેતૃત્વમાં ભાજપે વિકાસની નવી ઊંચાઇઓ સર કરી છે. ગુજરાતનું નવું નેતૃત્વ જે જે સંભાળશે તેના માર્ગદર્શન હેઠળ પણ ગુજરાતની વિકાસયાત્રા અવિરતપણે આગળ વધતી રહેશે. મારા કાર્યકાળ દરમ્યાન મને વડાપ્રધાન નરેન્દ્ર મોદીનું માર્ગદર્શન સતત મળતું રહ્યું છે. આ ઉપરાંત પાંચ વર્ષના મારા કાર્યકાળ દરમ્યાન ગુજરાતના પ્રજાજનોનો પણ મને અભૂતપૂર્વ સહકાર મળ્યો છે. પાર્ટી હવે મને જે જવાબદારી સોંપશે તે હું પૂરી પ્રતિબદ્ધતાથી નિભાવીશ તેમ રૂપાણીએ કહ્યું.

રૂપાણીએ રાજભવન ખાતે મીડિયાને સંબોધન કરતા કહ્યું કે હું ભાજપ ટોચના મોવળી મંડળનો આ જવાબદારી બદલ આભાર વ્યક્ત કરૂં છું. મેં મુખ્યમંત્રી તરીકે તમામ દાયિત્વ નિભાવ્યા છે. મારા કાર્યકાળમાં ગુજરાતને વિકાસના નવા પંથે આગળ વધાર્યું હતુ.

પૂર્વ મુખ્યમંત્રીએ રૂપાણીએ કહ્યું કે આ રાજીનામું મારી રાજીખુશીથી આપ્યું છે. મારી પાસે આ રાજીનામું માંગવામાં નથી આવ્યું. મારા અને સંગઠન વચ્ચે કોઈ ટકરાવ નથી. હું ભાજપનો જ માણસ છું અને કાર્યકર્તા તરીકે આગળ કામ વધારીશ. નવા નેતૃત્વમાં ગુજરાતનો વિકાસ થશે અને નવા આયામ સર થશે તેવી આશા સાથે હું આજે મુખ્યમંત્રી પદેથી વિદાય લઉં છું.

રૂપાણીએ પ્રેસ વાર્તા દરમિયાન ટકોર કરતા કહ્યું કે ગુજરાતમાં સરકાર રૂપાણી કે કોઈ અન્ય નથી ચલાવતું. દરેક ચૂંટણી અને કાર્ય નરેન્દ્ર મોદીના વડપણ હેઠળ જ લડાઈ છે. સરકાર રૂપાણી કે કોઈ અન્યની નથી મોદીના નેતૃત્વ હેઠળ જ બધું ચાલી રહ્યું છે. દેશ તો મોદીનો જ છે, તેમ રૂપાણીએ ઉમેર્યું હતુ.

જોકે એકાએક રાજીનામાનું કારણ આપવાનું રૂપાણી સહિતના ટોચના નેતાઓ ટાળ્યું હતુ. કેન્દ્રિય મંત્રી મનસુખ માંડવિયાએ કહ્યું કે હું સીએમ પદનો દાવેદાર નથી. ભૂપેન્દ્રસિંહ ચુડાસમાએ કહ્યું કે આ નિર્ણય વિચારવિમર્શથી લેવામાં આવ્યો છે.

Previous article

Next Post

Next article

Previous Post